===本文圖照===

613◇【臺灣台語】係豬哥搭狗膦个名詞(彭欽清教授語音文)(一字一語客四縣對照錄音)(07：07分)→https://drive.google.com/file/d/1VsH2DIoXfeKfpKfTeF4ZjvTasKqTIJsU/view?usp=sharing

客家社團、學者過關心客家語言文化个大眾，就在七月二十七發起抗議集會，請大家上台講意見。結果羅肇錦教授第二日就分主張臺灣台語个人圍剿，講佢係大統派。台灣已像又變轉戒嚴時期，做毋得講反政府政策个話。

三、四十年前，台灣盡多人講希望台灣做得變到東方个瑞士，因爲瑞士个的地理環境，面積，還過族群結構同臺灣已像。筆者認爲臺灣愛變到東方瑞士，愛先學啊瑞士人个量度。 

瑞士面積比臺灣較大兜仔，乜係盡多山仔。有四種官方語言，瑞士德語人口大約佔65%，法語20%，義大利語7%，羅曼許語0.6%。瑞士德語事實上係盡多方言个總稱，瑞士政府另外訂有瑞士標準德語，好分各地講這兜方言个人來溝通過方便其他語群人士學習。雖然講瑞士德語个人口佔大碼，私底下也認爲佢這兜个話就係瑞士語，毋過考慮著語群平權，官方文書還係講佢係瑞士德語，毋係瑞士語。

臺灣閩南人，客人，外省人，原住民个比例同瑞士差毋多。政府從2003年頒布國民中小學九年一貫課程綱要，將語言學習領域分到國語文，閩南語，客家語，原住民語同英語，並分別規劃有課程綱要。閩南語个課程綱要也係經過學者再三斟酌正定案，當初會用閩南語這隻詞，也應該係考量語群平權个結果。

已多臺灣人慣講閩南語係台語，毋過課程綱要既然訂為閩南語，教育部官員要求教科書廠商照官方文書改台語為閩南語，係佢這兜盡著責任；之前个官員無恁樣要求，係失職。這下照課程綱要 辦事个教育部官員，顛倒分這兜所謂本土社團講佢這兜除臺灣化，歧視臺灣人，請問將來愛政府官員仰仔來依法行事？

講一句老狗屎个話“瑞士做得著，臺灣做麼个做毋著？”簡單講，瑞士做得著，係占大碼个瑞士德語群知仰仔來配合政府語言政策，毋會大欺細。臺灣愛變到東方个瑞士，佔臺灣大碼个閩南語群个人，愛先學啊瑞士德語群个量度。